బైబిల్ ని ఎలా అర్థము చేసుకోవాలి? – పాతనిబంధన విశ్లేషణ: How to understand the Bible

పరిచయం: బైబిల్ అనే అద్భుత గ్రంథాలయం (The Library of Books)

పాత నిబంధన (Old Testament) అనేది దేవుడు తన కుమారుని కోసం అనగా క్రీస్తు యేసు కోసం ఒక వధువును వెతుకుతున్న అద్భుతమైన కథ. బైబిల్ గ్రంథాన్ని లోతుగా అధ్యయనం చేసే ముందు, మనం ఒక ప్రాథమిక సత్యాన్ని గ్రహించాలి. బైబిల్ అనగానే మనకు ఒకే పుస్తకం అనిపిస్తుంది, కానీ వాస్తవానికి అది ఒకే గ్రంథం కాదు. “బైబిల్” (Bible) అనే పదం “బిబ్లా” (Bibla) అనే లాటిన్ పదం నుండి ఉద్భవించింది. దీని అర్థం ‘పుస్తకాలు’ (Books) అని. అనగా, బైబిల్ ఒక పుస్తకం కాదు, అదొక గ్రంథాలయం (Library). సుమారు వెయ్యి సంవత్సరాలకు పైగా కాలంలో, అనేక మంది భిన్నమైన రచయితలచే రాయబడిన 39 పుస్తకాల అద్భుత సమాహారమే ఈ పాత నిబంధన. ఇందులో ధర్మశాస్త్ర గ్రంథాలు, చరిత్ర పుస్తకాలు, కవిత్వ పుస్తకాలు, మరియు ప్రవక్తల పుస్తకములు ఉన్నాయి. అయితే ఇవన్నీ ఒకదానితో ఒకటి ఎలా ముడిపడి ఉన్నాయో అర్థం చేసుకోవడం ఎంతో ముఖ్యం. క్రైస్తవులుగా మనకు బైబిల్ మీద అవగాహన లేనిచో.. బైబిల్ ల్లో ఉన్న వాక్యములను మనము అపార్ధము చేసుకుంటాము.

దేవుడు మనకు ఒక “అంశాల ఆధారిత బైబిల్” (Topical Bible) ఇవ్వలేదు. అనగా రక్షణ గురించి మొత్తము ఒకచోట, పాపం గురించి మొత్తము ఒకచోట, పరిశుద్ధాత్ముడి గురించి మొత్తము ఒకచోట ఇవ్వలేదు.  ఒకవేళ అలా ఇచ్చి ఉంటే – ఆదికాండము మొత్తం దేవుని గురించి, నిర్గమకాండము మొత్తం యేసుక్రీస్తు గురించి, లేవీయకాండము మొత్తం పరిశుద్ధాత్మ గురించి ఇలా అంశాలవారీగా ఉండి ఉంటే బహుశా మనకు చాలా సులభంగా ఉండేదేమో. అప్పుడు మనం కాంకోర్డెన్స్ (Concordance) పుస్తకాలను వెదుక్కోవాల్సిన అవసరం ఉండేది కాదు. కానీ దేవుడు ఉద్దేశపూర్వకంగానే మనకు అటువంటి బైబిల్‌ను ఇవ్వలేదు. ఆయన వాక్యం లేదా ఏదైనా ఒక అంశంపై దేవుని బోధన బైబిల్ అంతటా విస్తరించి ఉంటుంది.

నేడు మనము చూసే  బైబిల్‌ల్లోని అధ్యాయాలు (Chapters), వచనాలు (Verses) అనే విభజన మానవులు చేసినదే కానీ, దేవుడు మనకు విడివిడి వచనాల పెట్టెను ఇవ్వలేదు. నేడు మనలో చాలా మంది 10 వచనాలను చదివి ఆగిపోతారు, 1 అధ్యాయము చదివి ఆగిపోతారు. తరువాత భాగము కొనసాగుతున్నా… నేడు నా వాక్య భాగము అయ్యిందిలే అని ఆపేస్తున్నారు. ఇట్టి తీరు మనలను వాక్యమును అర్థము చేసికొనుటలో మనలను విఫలులను చేస్తుంది.

బైబిల్‌లోని ప్రతి పుస్తకానికీ దానికంటూ ఒక ప్రత్యేకత ఉంది. ప్రతి వచనాన్ని (Text) ఆ పుస్తకం యొక్క సందర్భంలో (Context) చదవాలి. ఆ పుస్తకాన్ని దాని చారిత్రక నేపథ్యంతో కలిపి చూడాలి. దేవుడు తన వాక్యాన్ని “కాలం మరియు స్థలం” (Time and Space) అనే రెండు పరిస్థితులలో  ఇచ్చాడు. ఆ వాక్యం ఏ కాలంలో చెప్పబడింది? ఏ ప్రదేశంలో చెప్పబడింది? అనే రెండు కోణాలు మనకు స్పష్టంగా తెలియాలి. ఈ రండు విషయములను గమనించి బైబిల్ మనం చదివితే… బైబిల్ మనకు చాలా బాగా అర్థం అవుతుంది. ఎందుకంటే, దేవుడు ఎల్లప్పుడూ నిజ జీవిత పరిస్థితులలో, ఒక నిర్దిష్ట సమయం మరియు ప్రదేశంలో ఉన్న సమస్యను ఉద్దేశించే మాట్లాడాడు. ఈ రెండు సందర్భాలను (కాలం, స్థలం) మనం స్పష్టంగా గ్రహించినప్పుడే పాత నిబంధనను సంపూర్ణంగా అర్థం చేసుకోగలం. 

బైబిల్లో ఏ వాక్యము తీసుకున్న… దేవుడు ఆ పరిస్థితికి అనుగుణముగా మాట్లాడి ఉంటాడు.  అందుకే మనము ఈ చిన్న ఆర్టికల్ ద్వారా బైబిల్లో ఉన్న పాతనిబంధన ను అర్థం చేసుకోవడానికి పునాదులను నేర్చుకుందాం. 

స్థల పరిధిలో పాతనిబంధన – Space

Space అనగా ఇక్క ఖాళి అని కాదు. స్థలము అని అర్థము చేసుకోవాలి. బైబిల్లో ప్రత్యేకంగా స్థల పరిధులు, విషాలత, కొలతలు, ఏ స్థలము ప్రక్కన ఏది ఉంది అని బాగా తెలిసినచో బైబిల్ ని బాగా అర్థము చేసుకోవచ్చు.

బైబిల్ భౌగోళిక నేపథ్యం: పాత నిబంధన ప్రపంచ పటం (Geographical Background)

బైబిల్‌ను చదివేటప్పుడు మన మనస్సులో ఉండాల్సిన ముఖ్యమైన అంశం భౌగోళిక స్వరూపం (Geography). బైబిల్లో చెప్పబడిన ప్రదేశములను ఎంత బాగా కంఠస్థం చేస్తే… ఆ సందర్భాలు చదువుచున్నప్పుడు బైబిల్ అంతా బాగా అర్థము అవుతుంది. బైబిల్ చరిత్రను అర్థం చేసుకోవాలంటే ముఖ్యముగా రెండు పట్టాలు (Maps) మన కళ్ల ముందు ఉండాలి.

1. మొదటిది – మొత్తం మధ్యప్రాచ్య (Middle East) ప్రాంతపు పటం
2. రెండవది – అందులో ఉన్న వాగ్దత్త భూమి (Promised Land) పటం. (కనాను, నేడు Israel)

మధ్యప్రాచ్య పటాన్ని గమనిస్తే, అందులో ఒక “సారవంతమైన అర్ధచంద్రాకార ప్రాంతం” (The Fertile Crescent) కనబడుతుంది. ఇది ఆనాటి ప్రాచీన ప్రపంచానికి ప్రాణనాడి. ఈ అర్ధచంద్రాకారం రెండు పెద్ద నదీ పరీవాహక ప్రాంతాలను కలుపుతుంది. ఒకవైపు ఈజిప్టులోని నైలు నది (Nile River), మరొకవైపు టైగ్రిస్ (Tigris) మరియు యూఫ్రటీస్ (Euphrates) నది. ఈ రెండు నదుల మధ్య ఉన్న ప్రాంతాన్నే ‘మెసొపొటేమియా’ (Mesopotamia) అంటారు. మెసో అనగా ‘మధ్య’, పొటేమియా అనగా ‘నదులు’. ఈ రెండు నదుల మధ్య ఉన్న ప్రాంతం అత్యంత సారవంతమైనది. ముఖ్యముగా పాత నిబంధనలో కనబడు చాలా సంఘటనలు ఈ నదుల మధ్య ఉన్న ప్రాంతములలో చోటుచేసుకున్నాయి.

ఈ రెండు ప్రాంతాలు ఆనాటి ప్రాచీన ప్రపంచంలో అత్యంత శక్తివంతమైన అధికార కేంద్రాలుగా ఉండేవి (World Powers). పాత నిబంధన చరిత్ర అంతా కూడా ఈ రెండు మహాశక్తుల ఈజిప్టు మరియు అస్సీరియా/బబులోను సామ్రాజ్యాలు మధ్య జరిగిన పోరాటమే. ప్రస్తుతం ఇరాక్ (సద్దాం హుస్సేన్ కాలపు దేశం), ఇరాన్ దేశాలు ఉన్న ప్రాంతమే ఈ టైగ్రిస్-యూఫ్రటీస్ నదులు. ఈ రెండు మహా శక్తుల మధ్యలో ఇజ్రాయెల్ దేశం (వాగ్దత్త భూమి) ఉంది. అందుకే ఈ ఇస్రాయెలు దేశాన్ని – The Crossroads of the World (ప్రపంచ నలుమూలల కూడలి) అని అంటారు.

ప్రపంచ నలుమూలల కూడలి (The Crossroads of the World)

ఈ రెండు మహా సామ్రాజ్యాలు ఒకదానిపై మరొకటి దాడి చేయాలన్నా, లేదా తమ సైన్యాలను తరలించాలన్నా నేరుగా వెళ్లడానికి వీలులేదు. ఎందుకంటే వారి మధ్యలో అరేబియా ఎడారి మరియు సహారా ఎడారి ఉన్నాయి. ఎడారి గుండా ప్రయాణిస్తే సైన్యానికి ఆహారం, నీరు దొరకవు. దానికి తోడు అక్కడ “నల్లటి బసాల్ట్ రాయి” (Black Basalt Rock) అనే అత్యంత పదునైన రాతి పొర ఉంటుంది. ఒంటెలు కూడా ఆ రాళ్ల మీద నడవలేవు. కనుక, వారు తప్పనిసరిగా ఆ సారవంతమైన అర్ధచంద్రాకార రేఖ మీదుగానే, అంటే మధ్యధరా సముద్ర తీరానికి ఆనుకుని ఉన్న సన్నని మార్గం గుండానే అనగా ఇజ్రాయెల్ గుండా ప్రయాణించవలసి వచ్చేది.

కేవలము ప్రయాణముకు మాత్రమే కాదు… ఇజ్రాయెల్ దేశం అనేది ప్రపంచ వ్యాపార, రవాణా మరియు సైనిక మార్గాలకు ఒక ప్రధాన కూడలి (Crossroads of the World). ఎవరైనా ఒక ప్రధాన కూడలిలో నివసిస్తుంటే పదే పదే ప్రమాదాలకు గురవడం సహజం. ఇజ్రాయెల్ పరిస్థితి కూడా అదే. వారు నిరంతరం దాడులకు గురయ్యేవారు. గ్రీకులు, సిరియన్లు, ఈజిప్షియన్లు, రోమన్లు… ఇలా ఒకరి తర్వాత ఒకరు ఇజ్రాయెల్ మీదుగా ప్రయాణించి వారిని అణచివేశారు. ఒక ప్రదేశముకు నలుగురు వస్తు, పోతూ ఉంటే, వారి కన్ను కూడా ఆ ప్రదేశము మీద పడుతుంది.

యూరప్ నుండి అరేబియాకు వెళ్లే రహదారి సముద్ర తీరం మీదుగా వచ్చి, యెజ్రెయేలు (Esraelon/Jezreel) లోయ గుండా యోర్దాను లోయలోకి దిగి అరేబియా చేరుకుంటుంది. ఆఫ్రికా నుండి ఆసియాకు (ఇండియా, చైనా) వెళ్లే రహదారి కూడా తీర మైదానం గుండా వచ్చి, అదే యెజ్రెయేలు లోయ గుండా, కపెర్నహూము మీదుగా, డమాస్కస్ ద్వారా ఆసియా చేరుకుంటుంది. ఖచ్చితంగా ఈ మార్గాలన్నీ కలిసే చోటే ‘మెగిద్దో’ (Megiddo) అనే కొండ ఉంది. ఈ మెగిద్దో కొండకే హీబ్రూ భాషలో ‘హార్-మెగెద్దాన్’ లేదా ‘ఆర్మెగెడాన్’ (Armageddon) అని పేరు. అందుకే చరిత్రలో అత్యంత భయంకరమైన, అతిపెద్ద యుద్ధాలన్నీ ఈ ప్రదేశంలోనే జరిగాయి.

ఈ కూడలిని పైనుండి చూస్తూ ఉండే ఒక చిన్న గ్రామమే నజరేతు (Nazareth). ఇక్కడే అసలు విషయము ఉంది. యేసుక్రీస్తు బాలునిగా ఉన్నప్పుడు ఆ కొండ మీద పడుకుని ప్రపంచం నలుమూలల నుండి వస్తున్న ప్రజలను చూసేవాడు. అదొక అంతర్జాతీయ విమానాశ్రయం లాంటిది. వివిధ దేశాల వారు అక్కడికి వస్తూ పోతూ ఉండేవారు. అందుకే ఆ ఉత్తర ప్రాంతాన్ని ‘అన్యజనుల గలిలయ’ (Galilee of the Nations) అని పిలిచేవారు. కానీ దానికి భిన్నంగా దక్షిణాన ఉన్న యూదయ ప్రాంతం, యెరూషలేము పూర్తిగా కొండలలో ఏకాంతంగా, సంప్రదాయబద్ధంగా ఉండేవి.

దేవుడు తన ప్రజలను ఈ ప్రపంచ కూడలిలో ఎందుకు ఉంచాడు? ఎందుకంటే, దేవుని పరిపాలనలో జీవిస్తే ఎంత గొప్ప ఆశీర్వాదం వస్తుందో, ఆయన ఆజ్ఞలను మీరితే ఎంతటి శాపం వస్తుందో యావత్ ప్రపంచానికి ఒక నమూనాగా (Model of the Kingdom of Heaven on Earth) చూపించడానికే దేవుడు ఇజ్రాయెల్‌ను ఆ ప్రదేశంలో ఉంచాడు.నేడు కూడా ప్రపంచములో ఇస్రాయెలు దేశముకు ప్రత్యేకమైన స్థానం మరియు గుర్తింపు ఉంది.

Jesus 2nd Word Telugu: యేసు సిలువలో పలికిన 2 రెండవ మాట

వాగ్దత్త భూమి భౌగోళిక స్వరూపం: ఒక సూక్ష్మ ప్రపంచం (A Miniature World)

ఇజ్రాయెల్ దేశం వేల్స్ (Wales) దేశమంత చిన్న ప్రాంతం అయినప్పటికీ, ప్రపంచంలోని అన్ని రకాల వాతావరణ పరిస్థితులు, ప్రకృతి సౌందర్యాలు ఇక్కడ కనిపిస్తాయి. యోర్దాను నది ప్రవహించే లోయ భూమి ఉపరితలంపై ఉన్న అతిపెద్ద పగులు. ఇది సముద్ర మట్టం కన్నా ఎంతో దిగువన ఉంటుంది. ఆ నది వెళ్లి మృత సముద్రంలో (Dead Sea) కలుస్తుంది, అక్కడి విపరీతమైన వేడికి ఆ నీరంతా ఆవిరైపోతుంది.

ఇజ్రాయెల్‌లో అద్భుతమైన వైవిధ్యం ఉంది. టెల్ అవీవ్ (Tel Aviv) దక్షిణాన ఉన్న ప్రాంతం ఇంగ్లాండ్ లాగా కనిపిస్తుంది. కార్మెల్ పర్వతాన్ని లిటిల్ స్విట్జర్లాండ్ (Little Switzerland) అని పిలుస్తారు. హెర్మోన్ (Mount Hermon) పర్వతం మీద ఏ కాలంలోనైనా మంచు ఉంటుంది, స్కీయింగ్ చేయవచ్చు. అక్కడి నుండి కేవలం 10 నిమిషాల ప్రయాణం చేస్తే ఉష్ణమండలాల్లో ఉండే ఖర్జూర (Palm) చెట్లు కనిపిస్తాయి. యూరప్, ఆఫ్రికా, ఆసియా ఖండాల వృక్షజాలం, జంతుజాలం అంతా ఇక్కడ కనిపిస్తుంది. స్కాటిష్ పైన్ చెట్లు, సహారా ఎడారి అరచేయి చెట్లు పక్కపక్కనే పెరుగుతాయి. ఒకప్పుడు సింహాలు, ఎలుగుబంట్లు, మొసళ్లు, ఒంటెలు అన్నీ ఆ చిన్న భూభాగంలో ఉండేవి.

ఈ భౌగోళిక స్వరూపాన్ని అర్థం చేసుకుంటే, సువార్తలలో గలిలయులు యేసుక్రీస్తును ఎందుకు అంగీకరించారో, కొండప్రాంతాలలోని యూదులు (Judeans) ఆయనను ఎందుకు వ్యతిరేకించి సిలువ వేశారో మనకు స్పష్టంగా అర్థమవుతుంది. బైబిల్‌లో “యూదులు యేసును చంపారు” అని చదివినప్పుడు దాని అర్థం ఇజ్రాయేలీయులందరూ కాదు, దక్షిణాన ఉన్న యూదయ ప్రాంతస్థులు అని మాత్రమే. ఇలా ఎన్నో విషయములు ఈ అధ్యయనములో నేర్చుకుంటాము.

ఇక (TIME) సమయము గురించి కూడా కొంచం అవగాహనా తెచ్చుకుందాం!

పాత నిబంధన చారిత్రక కాలక్రమం (The Dimension of Time: 2000 Years)

భౌగోళిక స్వరూపం తర్వాత పాతనిబంధనను అర్థము చేసుకొనుటకు మనం తెలుసుకోవలసిన అత్యంత ముఖ్యమైన కోణం సమయం (Time). పాత నిబంధన క్రీస్తు పూర్వం 2000 సంవత్సరాల చరిత్రను కలిగి ఉంది.

ఆదికాండము 1 నుండి 11 అధ్యాయాల వరకు ఉన్న చరిత్రను “చరిత్ర పూర్వయుగం” (Prehistoric period to Israel) అనవచ్చు. ఇందులో విశ్వ సృష్టి, ఏదెను తోటలో మానవుని పతనం, నోవహు జలప్రళయం, బాబెల్ గోపురపు గాథలు ఉన్నాయి. ఇవన్నీ దేవుడు ఇజ్రాయెల్ జాతిని ఎంచుకోక ముందు జరిగిన మానవ జాతి సాధారణ చరిత్ర. సహజ మానవ ఉత్పత్తి మరియు నాగరికతను మానవుడు నేర్చుకుంటున్న క్రమము. 

నిజమైన ఇశ్రాయేలియుల చరిత్ర, క్రీస్తు పూర్వం 2000వ (2000 BC) సంవత్సరంలో ప్రారంభమవుతుంది. ఈ 2000 సంవత్సరాల కాలాన్ని మనం ఒక్కొక్కటి 500 సంవత్సరాలు గల నాలుగు సమాన విభాగాలుగా విభజించుకోవచ్చు. ఈ నాలుగు విభాగాలను గుర్తుపెట్టుకోవడానికి నాలుగు ప్రధాన సంఘటనలు, నలుగురు ప్రముఖ వ్యక్తులు, నాలుగు రకాల నాయకత్వాలను మనం అర్థం చేసుకోవాలి. ఇంగ్లీష్ లో అయితే పదముల వరుస – Election, Exodus, Empire, Exile ఈ విధంగా చూడవచ్చు.

క్రీస్తు పూర్వం 2000 (2000 BC): ఎన్నిక (Election)

ఈ కాలంలో దేవుడు అబ్రాహామును ఎన్నుకున్నాడు. అబ్రాహాము నుండి యోసేపు వరకు ఇజ్రాయేలీయులు పితృస్వామికుల (Patriarchs) నాయకత్వంలో నడిపించబడ్డారు. ఈ అబ్రహము గురించి ఇంకా తెలుసుకోవాలంటే – అబ్రాహాము చరిత్ర అను ఆర్టికల్ ను చదువగలరు.

క్రీస్తు పూర్వం 1500 (1500 BC): నిర్గమనం (Exodus)

మోషే నాయకత్వంలో ఇశ్రాయేలియుల ఈజిప్టు బానిసత్వం నుండి బయటకు వచ్చారు. మోషే మొదలుకొని సమూయేలు వరకు ప్రవక్తలు (Prophets) వారికి నాయకత్వం వహించారు.

క్రీస్తు పూర్వం 1000 (1000 BC): సామ్రాజ్యం (Empire)

దావీదు మహారాజు కాలంలో ఇశ్రాయేలి రాజ్యము అత్యున్నత శిఖరాలను చేరుకుంది. దేవుడు వాగ్దానం చేసిన భూమి అంతా వారి వశమైంది. అనూహ్యమైన సంపద, శాంతి వర్ధిల్లాయి. కవిత్వం, కళలు అత్యున్నత స్థాయికి చేరుకున్నాయి (కీర్తనలు, సామెతలు రాయబడింది ఈ కాలంలోనే). సౌలు మొదలుకొని సిద్కియా వరకు వీరు రాజుల (Princes/Kings) నాయకత్వంలో ఉన్నారు.

క్రీస్తు పూర్వం 500 (500 BC): ప్రవాసం/చెర (Exile)

ఇది ఇశ్రాయేలియుల చరిత్రలో అత్యంత దిగువ స్థాయి (Lowest point). వారు దేవుని వాగ్దత్త భూమిని కోల్పోయి బబులోనుకు ప్రవాసులుగా వెళ్లారు. ఈ కాలంలో యెషయా లాంటి గొప్ప ప్రవక్తలు ఉన్నారు. ప్రవాసం నుండి తిరిగి వచ్చిన యెహోషువ, జెరుబ్బాబెలు కాలం నుండి క్రీస్తు కాలంలోని కయప వరకు వీరు యాజకుల (Priests) నాయకత్వంలో నడిపించబడ్డారు.

ఇలా ఇశ్రాయేలియుల నాయకత్వం పితరుల నుండి ప్రవక్తలకు, వారి నుండి రాజులకు, ఆపై యాజకులకు మారింది. వీరందరూ ఏదో ఒక సమయంలో విఫలమయ్యారు. అందుకే ప్రవక్త, యాజకుడు, రాజు… ఈ మూడు పాత్రలూ ఒకే వ్యక్తిలో మూర్తీభవించిన యేసుక్రీస్తు కోసం వారు ఎదురుచూడాల్సి వచ్చింది.

తరువాత బైబిల్లో కనబడు మరియొక కాలముకు సంబంధించిన విషయము. నిశ్శబ్ద కాలములు. అనగా దేవుడు మౌనముగా ఉన్న కాలము. దేవుడు ఎవ్వరితో మాట్లాడని రోజులు.

బైబిల్లో కనబడు రెండునిశ్శబ్ద కాలాలు (The Two 400-Year Gaps)

తరువాత బైబిల్ పాతనిబంధనను అర్థము చేసికొనుట మనము అర్థము చేసుకోవలసిన మరో విషయము ఏమిటంటే నిశబ్ద కాలములు.  బైబిల్ చరిత్రలో రెండు అతిపెద్ద “ఖాళీలు” (Gaps) ఉన్నాయి. రెండు సార్లు 400 సంవత్సరాల పాటు దేవుడు మౌనంగా ఉండిపోయాడు. ఆయన ఏమీ మాట్లాడలేదు, ఏ కార్యమూ చేయలేదు. అవి ఏమీ అంటే:

1. మొదటి 400 సంవత్సరాల ఖాళీ ఆదికాండము మరియు నిర్గమకాండము మధ్య ఉంది. (బానిసత్వంలో ఉన్న కాలం).
2. రెండవ 400 సంవత్సరాల ఖాళీ మలాకీ గ్రంథానికి మరియు మత్తయి సువార్తకు మధ్య ఉంది.

ఈ ఖాళీ సమయాల్లో రాయబడిన గ్రంథాలు మన బైబిల్‌లో లేవు. ఉదాహరణకు, ‘అపోక్రిఫా’ (Apocrypha) గ్రంథాలు ఈ రెండవ ఖాళీ సమయంలోనే రాయబడ్డాయి. రోమన్ క్యాథలిక్ క్రైస్తవులు వీటిని తమ బైబిల్‌లో కలుపుకుంటారు. గానీ ప్రొటెస్టెంట్ క్రైస్తవులు కలుపుకొనరు. ఎందుకంటే అందులో మృతుల కోసం ప్రార్థించడం (Purgatory) వంటి అంశాలు ఉంటాయి. కానీ దేవుడు మౌనంగా ఉన్న సమయంలో రాయబడినవి కాబట్టి అవి దైవప్రేరేపిత గ్రంథాలు కావు. మరియు అవి మిగితా బైబిల్ పుస్తకాల దేవుని నియమములకు భిన్నముగా ఉన్నాయి కాబట్టి. అందుకే ప్రొటెస్టెన్ క్రైస్తవులు వాడే బైబిల్లో 66 పుస్తకాలు ఉంటాయి. క్యాథలిక్ క్రైస్తవ్లులు వాడే బైబిల్లో 73 పుస్తకాలు ఉంటాయి.

క్రైస్తవ సంఘ చరిత్ర: Christian Church History in Telugu

ఈ నిశబ్ద కాలము గురించి కొందరు తప్పుడు బోధకులు  తప్పుడు అభిప్రాయములు చెప్పారు. మనం తరచుగా బైబిల్‌లో “జీవముగల దేవుడు” (The Living God) అనే పదం వింటుంటాం. దీని అర్థం ఏమిటి? దేవుడు చురుకుగా ఈ భూమి మీద పనిచేయడం, మాట్లాడటం అని అర్థం. కొంతకాలం క్రితం కొందరు వేదాంతవేత్తలు “దేవుడు మరణించాడు” (God is dead) అన్నారు. దాని అర్థం దేవుని అస్తిత్వం నాశనమైందని కాదు. దేవుడు ఈ లోక వ్యవహారాలలో జోక్యం చేసుకోవడం లేదని, ఆయన యాక్టివ్‌గా లేడని వారి ఉద్దేశం. (ఉదాహరణకు: ఒక తండ్రికి ఒక కుమార్తె ఉంది. ఆమె మరణించింది. తన 36 ఏళ్ల కుమార్తె మరణించిన విషయాన్ని ప్రస్తావించారు. ఆమె మరణించినంత మాత్రాన ఆమె అస్తిత్వం కోల్పోలేదు. ఆమె దేవుని వద్ద స్పృహతో, సజీవంగానే ఉంది, కానీ ఈ లోకంలో ఆమె తన ఉనికిని కనబరచడం లేదు. ఒకరకంగా ఈ లోకానికి ఆమె మరణించింది). దేవుడు కూడా ఆ 400 సంవత్సరాల పాటు ఈ లోకానికి దూరంగా ఉన్నాడు, ఆయన ఏ కార్యమూ చేయలేదు. అంత మాత్రాన, ఆయన చనిపోయాడు అనుకుంటే ఎలా?

ఆసక్తికరమైన విషయం ఏమిటంటే, దేవుడు మౌనంగా ఉన్నప్పుడే మానవుడు తన సొంత జ్ఞానంతో చాలా పనులు చేశాడు. ఈ 400 సంవత్సరాల ఖాళీలలోనే ఈజిప్టు, భారతీయ (Indian), చైనా సంస్కృతులు అభివృద్ధి చెందాయి. సోక్రటీస్, ప్లేటో, అరిస్టాటిల్ వంటి గ్రీకు తత్వవేత్తలు, బుద్ధుడు, కన్ఫ్యూషియస్ వంటి వారు ఈ కాలంలోనే ఉద్భవించారు. అలెగ్జాండర్ ది గ్రేట్, జూలియస్ సీజర్ వంటి వారు కూడా దేవుడు మౌనంగా ఉన్న ఆ 400 సంవత్సరాల కాలంలో వచ్చిన వారే. కానీ అవి దేవుని ప్రవచనాత్మక చరిత్రలో భాగం కావు.

హీబ్రూ బైబిల్ వర్సెస్ ఆంగ్ల బైబిల్ (Hebrew vs English Bible)

మనం వాడుతున్న ఆంగ్ల బైబిల్ (మరియు తెలుగు బైబిల్ అనువాదాలు) యొక్క కూర్పుకు, అసలైన హీబ్రూ బైబిల్ కూర్పుకు చాలా పెద్ద వ్యత్యాసం ఉంది. ఆంగ్ల బైబిల్ అనువాదకులు పుస్తకాలను మూడు విభాగాలుగా విభజించారు:

1. చరిత్ర పుస్తకాలు: ఆదికాండము మొదలుకొని ఎస్తేరు వరకు.
2. కవిత్వ పుస్తకాలు: యోబు నుండి పరమగీతాల వరకు.
3. ప్రవచనాత్మక పుస్తకాలు: యెషయా నుండి మలాకీ వరకు (వీటిని తిరిగి మేజర్ మరియు మైనర్ ప్రవక్తలుగా విభజించారు. మేజర్ అంటే గొప్పవారని, మైనర్ అంటే తక్కువవారని కాదు… వారు రాసిన గ్రంథాల పరిమాణాన్ని బట్టి ఆ పేరు పెట్టారు). వీటిని ప్రవక్తల పెద్ద పుస్తకములు మరియు ప్రవక్తల చిన్న పుస్తకములు అని అనడం సబబు.

కానీ ఈ అమరిక పాత నిబంధనను సరిగ్గా అర్థం చేసుకోవడానికి పెద్దగా సహాయపడదు. హీబ్రూ బైబిల్ పద్ధతి (Hebrew Scriptures) పూర్తిగా భిన్నంగా ఉంటుంది. వారు బైబిల్‌ను మూడు స్పష్టమైన విభాగాలుగా విభజించారు:

1. ధర్మశాస్త్రం (Law / Torah): మొదటి ఐదు పుస్తకాలను (ఆదికాండము నుండి ద్వితీయోపదేశకాండము) వారు చరిత్రగా చూడరు, దేవుని చట్టంగా పరిగణిస్తారు. వీటి పేర్లు కూడా మొదటి వచనంలోని పదాలను బట్టి ఉంటాయి.
2. ప్రవక్తలు (The Prophets): ఆశ్చర్యకరంగా, మనం చరిత్ర పుస్తకాలుగా భావించే యోషువ, న్యాయాధిపతులు, సమూయేలు, రాజులు వంటి పుస్తకాలను యూదులు “పూర్వపు ప్రవక్తలు” (Former Prophets) అంటారు. యెషయా, యిర్మీయా మొదలైనవారిని “తర్వాతి ప్రవక్తలు” (Latter Prophets) అంటారు.
3. రచనలు (The Writings): కవిత్వ పుస్తకాలు, రూతు, దినవృత్తాంతాలు, దానియేలు వంటివన్నీ ఈ విభాగంలోకి వస్తాయి.

ప్రవచనాత్మక చరిత్ర (Prophetic History) అంటే ఏమిటి?

సాధారణ చరిత్రకారుడు చరిత్ర రాసేటప్పుడు రెండు సూత్రాలను పాటిస్తాడు:

1. ఎంపిక (Selection) – ఏది రాయాలి, ఏది వదిలేయాలి.
2. అనుసంధానం (Connection) – ఒక సంఘటనకు మరో సంఘటనకు ఉన్న సంబంధం ఏమిటి?

కానీ “ప్రవచనాత్మక చరిత్ర” అలా ఉండదు. ఇది దేవునికి ఏది ముఖ్యమో దానిని మాత్రమే ఎంపిక చేసుకుంటుంది (అందుకే బైబిల్‌లో బుద్ధుని గురించి, అలగ్జాండర్ గురించి వేరే ఇతర విషయాల ప్రస్తావన ఉండదు). అలాగే ప్రతి సంఘటనను దేవుని ఉద్దేశంతో అనుసంధానిస్తుంది (Connects everything with God). యోషువ, న్యాయాధిపతులు, సమూయేలు, రాజులు గ్రంథాలు ఈ కోవలోకి వస్తాయి కాబట్టే వాటిని “ప్రవక్తల గ్రంథాలు” అంటారు.

కానీ రూతు గ్రంథం, దినవృత్తాంతాలు, ఎస్తేరు గ్రంథం ఈ కోవలోకి రావు. ఉదాహరణకు, రూతు గ్రంథం న్యాయాధిపతుల కాలంలో జరిగినదే అయినా, అందులో “దేవుడు ఇలా సెలవిచ్చుచున్నాడు” అనే మాట ఒక్కటి కూడా కనబడదు. దేవుడు ప్రత్యక్షంగా అందులో ఏ కార్యమూ చేయడు. అందుకే దానిని ప్రవక్తల విభాగంలో కాకుండా “రచనలు” (Writings) విభాగంలో ఉంచారు. దినవృత్తాంతాల గ్రంథం (Chronicles) రాజుల గ్రంథంలా అనిపించినా, దాని కోణం పూర్తిగా భిన్నంగా ఉంటుంది.

యేసుక్రీస్తు కూడా పునరుత్థానుడైన తర్వాత ఎమ్మాయు మార్గంలో వెళుతున్న శిష్యులకు బైబిల్ అధ్యయనం (Bible Study) చేసినప్పుడు, “మోషే ధర్మశాస్త్రము, ప్రవక్తలు, కీర్తనలు (రచనలు)” అని ఇవే మూడు విభాగాలను ప్రస్తావించాడు (లూకా 24:44). కాబట్టి పాత నిబంధనను ఒక సాధారణ చరిత్రగా కాకుండా, దేవుని ప్రవచనాత్మక చరిత్రగా చదవడం అత్యంత ఆవశ్యకం. అప్పుడే అది ఈనాడు మనతో దేవుని వాక్యంగా మాట్లాడుతుంది. అపోక్రిఫా గ్రంథం కేవలం చారిత్రక సమాచారాన్ని ఇస్తుంది తప్ప, దేవుని స్వరాన్ని వినిపించలేదు.

ధర్మశాస్త్రం లేదా తోరా: బైబిల్‌కు మూలస్తంభం (The Foundation of the Bible)

మొదటి ఐదు పుస్తకాలు (పంచకాండాలు) పాత నిబంధనకు అత్యంత కీలకమైన పునాది. దీనిని మోషే ధర్మశాస్త్రం అని అంటారు (మోషే వ్రాసాడు మరియు ఇచ్చాడు గనుక). వీటి నిర్మాణంలో ఒక అద్భుతమైన “డయాబోలో” కనబడుతుంది. Diabolo అనగా – ఒక రకమైన ఆటబొమ్మ, రెండు వైపులా వెడల్పుగా ఉండి మధ్యలో సన్నగా ఉంటుంది) ఆకృతి కనిపిస్తుంది.

• ఆదికాండము (Beginnings): ఇది యావత్ మానవ జాతి గురించి మాట్లాడుతుంది. శతాబ్దాల కాలాన్ని కవర్ చేస్తుంది. కనాను భూమి దీనికి నేపథ్యం.
• నిర్గమకాండము (Going Out): ఇది మానవ జాతి నుండి ఇజ్రాయెల్ అనే ఒక “జాతీయ జీవితం” (National Life) వైపు కుదించబడింది. కొన్ని సంవత్సరాల కాలాన్ని మాత్రమే కవర్ చేస్తుంది. ఈజిప్టు నుండి బయటకు రావడం దీని నేపథ్యం.
• లేవీయకాండము (About Levites): ఇది మరింత సూక్ష్మంగా మారి కేవలం “ఒకే ఒక గోత్రం” (లేవీయులు) గురించి మాట్లాడుతుంది. కేవలం ఒకే ఒక నెల రోజుల కాలాన్ని కవర్ చేస్తుంది. సీనాయి పర్వతం వద్ద జరుగుతుంది. (ఇది డయాబోలో ఆకృతికి మధ్యలో ఉన్న అత్యంత సన్నని భాగం).
• సంఖ్యాకాండము (Numbers): మళ్లీ ఇక్కడి నుండి విస్తరించడం ప్రారంభమవుతుంది. ఇది జాతీయ జీవితం గురించి, అరణ్య ప్రయాణపు సంవత్సరాల గురించి చెబుతుంది.
• ద్వితీయోపదేశకాండము (Second Law): మళ్లీ మానవ చరిత్ర అంతటినీ స్పృశిస్తూ, శతాబ్దాల చరిత్రను వివరిస్తూ, వాగ్దత్త భూమి సరిహద్దుల వద్ద ముగుస్తుంది.

ఈ అద్భుతమైన అమరికను గమనిస్తే ఈ ఐదు పుస్తకాలు ఎంత లోతైనవో, ఎంత పకడ్బందీగా రాయబడ్డాయో అర్థమవుతుంది. పాత నిబంధన అంతటినీ అర్థం చేసుకోవడానికి ఈ ఐదు పుస్తకాలే కీలకం. ముఖ్యంగా ఆదికాండము బైబిల్ అంతటికీ పునాది.

కాలక్రమానుసార బైబిల్ పఠన ఆవశ్యకత (Chronological Reading)

నిజంగానే బైబిల్ ని వరుసగా చదువుతూ వెళితే… బైబిల్ ఎప్పటికీ అర్థము అవ్వదు. బైబిల్ ను కాలక్రమ పద్ధతిలో (Chronological Order) చదివితేనే అర్థము అవుతుంది.

ప్రవక్తల పుస్తకాలు చదివేటప్పుడు అవి ఎప్పుడు రాయబడ్డాయో (ప్రవాసానికి ముందా? ప్రవాస సమయంలోనా? ప్రవాసం తర్వాతా?) తెలుసుకోవడం చాలా అవసరం. ప్రొఫెసర్ లాగార్డ్ స్మిత్ (Lagard Smith) రూపొందించిన “క్రోనలాజికల్ బైబిల్” (Chronological Bible) ఇటువంటి అవగాహనకు ఎంతో సహాయపడుతుంది. అందులో అధ్యాయాలు, వచనాల సంఖ్యలు ఉండవు. దేవుడు చరిత్రలో ఏ క్రమంలో మాట్లాడాడో, పనిచేశాడో ఆ క్రమంలో పుస్తకాలను అమర్చారు. ఆ బైబిల్‌లో 365 నక్షత్రాల గుర్తులు ఉంటాయి, రోజుకు ఐదు పేజీల చొప్పున చదివితే సంవత్సరంలో బైబిల్ చరిత్రను దాని సరైన కాలం, ప్రదేశం (Time and Space context) ఆధారంగా అర్థం చేసుకోవచ్చు.

ముగింపు (Conclusion)

పాత నిబంధనను కేవలం పాత కథల సమాహారంగా చూడకూడదు. అది దేవుని హృదయాన్ని, ఆయన ప్రణాళికను తెలియజేసే జీవముగల గ్రంథం. అబ్రాహాముతో ప్రారంభమైన దేవుని ఎన్నిక, దావీదు కాలంలో ఉన్నత శిఖరాలను చేరుకుని, ప్రజల అవిధేయత వల్ల ప్రవాసానికి/ చెరకు దారితీసింది. ఆ పతనమే ఇశ్రాయేలియులలను ఒక మెస్సీయ (Messiah) కోసం ఎదురుచూసేలా చేసింది. దావీదు కుమారునిగా వచ్చే ఆ రాజు తమ పూర్వ వైభవాన్ని తిరిగి ఇస్తాడని వారు వేచి చూశారు. ఆ నిరీక్షణే క్రొత్త నిబంధనకు మార్గం సుగమం చేసింది. భౌగోళికంగా ఇశ్రాయేలియుల ప్రాముఖ్యత, చారిత్రకంగా దేవుని ప్రవచనాత్మక జోక్యం ఈ పాత నిబంధన గ్రంథాన్ని అత్యంత ప్రామాణికమైనదిగా, సజీవమైనదిగా నిలబెడుతున్నాయి. దీన్ని సరైన దృక్కోణంలో అధ్యయనం చేస్తే, దేవుని వాక్యం నేడు మనతో నేరుగా మాట్లాడుతుంది. తరువాత భాగములో ఇంకా ముందుకు కొనసాగుదాము.